Tu laadu
Laadu
yanna ma gadxé si laadu
Paraa biaana lidxidu
Paraa zé riuunda stidu
Ma zitu nga biaana ridxi yaya sti’ xahui
Ma biaanda guendanayeche’ sti’ ca guie’
ni ruzaani’ lu xtaani’ jñaa
Ca xiiñe’ ma qui zucaadiagaca’ diidxa’
ni biele’ ndaani’ ruaa bixhoze’
Ma bigani ca dxi guca’ xcuidi
rutuiluca’ naa nuaa gaca’ stobi
Nisi ridxi raca ndaani’ ti guidxi ro’ nga riudiaga’
ne tini sti’ ca dxi ca
Bisiaandadu xa lá
ni bisibani laanu
nácani yanna ti bandá’ nuaa guxiaya’
Tu laadu yanna
laadu
cani gucala’dxinu stobi nga ñacadu?
Imagen de portada: Eugen Klein, Muchacha, ca. 1910. Rijksmuseum [DP]